倒數第十三天 - 218

九月二十九日, 倒數第十三天

其實仲係咪應該仲叫做倒數第十三天呢. 因為FIFI 已經番左黎. 我原本仲諗住會送花上去FIFI 公司呢, 好彩冇送到, 因為FIFI 原來番左黎後仲會放假.

係咯, 今日我就會花花比FIFI. FIFI 總係有點奇怪, 一方面又話唔鍾意收花, 但一方面又比我覺得佢好似鍾意收咁. 希望佢唔會唔鍾意.

唔知FIFI 會唔會估到呢 (以佢咁聰明一定又估到啦...) , 見到我拎住花佢開唔開心呢, 佢咁細粒拎唔拎得起扎花呢. 唔理呀, 唔鍾意都要話鍾意.

又, 呢個係一個十八玫瑰花既花束. 點解係十八? 因為我同FIFI 係二月十八日相識的. 咁二呢? 我同FIFI , 一加一就係二咯.

FIFI 今日得閒, 會黎接我放工 ^.^. 平時都冇甘既機會. 之後FIFI 仲會陪我番屯門執行李. 我決定番到屋企就比佢知 呢度既存在, 等我執行李時唔好悶親佢...

仲會唔會有下一篇呢? 就睇FIFI 睇完鍾唔鍾意.

倒數第十四天 - 想像

九月二十八日, 倒數第十四天
正如上一篇所講, 我既行為同反應係比較遲純既 FIFI 番左黎幾日, 我先開始表現到我好掛住佢呢.


星期六晚, 知道FIFI 番左黎後, 最後我都係飛左出去FIFI 樓下, 下面既看更阿叔不停咁打量我, 但又唔敢開口盤問我. 我同 FIFI 去左間佢提議的CAFE, 香蕉船好好味, FIFI 推介果時好審慎, 好似怕我會嫌D野唔好味咁.但其實只要同FIFI一齊就會開心.

結果FIFI 成晚都在釣魚呢, 好眼訓, 對眼好細. 不過我都眼訓, 然後第朝仲要一早起身去史提夫既婚宴, 仲要做伴郎添.

史提夫都算係我最好朋友之一, 亦都係唯一一個見過FIFI 既朋友. 果日我睇住史提夫接新娘, 註冊簽紙擺酒, 忽然間覺得個場面好幸福.

於是我就話比FIFI 知, FIFI 話我知, "我地而家都好幸福呢"

嗯
說的也是.

其實雖則我覺得佢地好幸福, 但我諗我仲未有準備在中短期內 (分色員講既中短期, 即係一年半載咁咯), 想像到自己結婚. 不過, 邊個又知道將來既野呢. 正如我識FIFI果時, 都想像唔到會同左佢一齊, 更加想像唔到會可以抱住佢 鍚佢.

FIFI 都應該冇想像過佢會同我一齊吧..

倒數第十五天 - 土星, 行為遲鈍

九月二十七日, 倒數第十五天

今日打比FIFI, 佢有點唔妥, 古古怪怪的. 我問佢會唔會早番黎, 佢又支吾以對咁. 仲無啦啦話唔講住, 要收線. 呢個係之前冇出現過的.

我一方面諗, FIFI 係咪嬲左我呢? 況且我晏少少再打比佢, 已經去左遺言信箱, 令我又有點不安. 但另一方面我又諗, FIFI 係咪會提早番黎呢?

但, 點都估唔到, FIFI 就在今晚番左黎.

我腦海一片空白, 只係想叫FIFI 不如去我度, 陪我執埋野. 我甚至其實係想叫FIFI 夜晚唔好走, 第二朝先走. 因為我想, 應該有好多好多野想同FIFI 講, 會想整晚都攬住佢訓. 實在, 呢排攬枕頭攬到我有點扯火. 但最後我冇講出口.

但, 最後FIFI 好累, 回左屋企沖涼先. FIFI 以為我責怪佢呢. 其實, 我點會因為咁既事責怪FIFI. 不過事實就係, FIFI 太過聰明, 我個人又好聰明 (哈!). 所以 好多時 對方比既 "驚喜", 都得唔到預期既效果. 正如我都有諗過 FIFI 係咪會提早番黎, 正如FIFI 都諗過我係咪會拎部NOTEBOOK出去同佢一齊睇相相.

FIFI 為左見我而縮短行程, 我絕對係一萬個開心啦. 但, 我諗我既人實在係好遲鈍. 好多時, 一D好突然 既事, 我可能要 過一段時間先會有反應.

對 FIFI 今次提早回來, 都係咁上下. 但希望FIFI 對我有信心咯. 我對佢好, 我相信佢係知的.
不過, 可能真係要過一排, 我先後知後覺咁, 會好感謝FIFI 佢番左黎.....

倒數第十五天 - 只因喜歡 FEI

九月二十七日, 倒數第十五天

唔只係問題天天都多, 而係最近比較煩, 亦都越黎越怕. 同左FIFI一齊後, 令我諗既野多左, 個人亦都越黎越細膽 (!).

原因, 可能係未有FIFI 之前, 我咩都冇. 冇仔女, 冇老婆. 固然我有我既所謂事業, 有一堆 尚未淪為廢紙既股票. 但呢D 在我心目中, 都係極其虛幻既野.

以前我係咩都冇的, 但有左FIFI後, 就好似有左好多野. 然後有左好多野, 就開始怕失去咯. 呢個係之前一位朋友講既, 可能因為我太鍾意FIFI, 所以一路都好怕失去佢, 所以一路都唔敢開口話同佢一齊.

點都好, 總之有左FIFI, 諗既野就多左. 我係一個自我中心既人, 唔會點理人想點. 但我跑步, 都係為左FIFI 吧, 因為佢好似好開心咁. 不錯, 可能咁會對我既健康有幫助, 但唔係 FIFI, 我先唔會理呢D野咯. 咁為左 FIFI 唔好做一個 委屈而守寡既小婦人, 我都係跑多D步好D.

又或者, 以前對我黎講, 有冇工番都唔係一個問題, 但呢排, 就成日諗下如果失左業點算. FIFI 固然唔使我養. 但我都總係想比最好最好既東西佢嘛, 而最好最好既東西, 好多時都係要錢既.

所以我成日都諗, 如果我冇野做, FIFI仲係咪咁愛我. 我當然知道FIFI 唔係咁勢利既人. FIFI 後來有次仲話 "佢養住我一陣", 實在令人感動得沒話說. 不, 我唔係咁既意思, 就算我聽日就冇野做, 我都仲唔使要 FIFI 幫我. 我只係怕, 咁樣會令佢覺得難受, 怕佢會覺得同人講佢男朋友 比呢個金融海嘯捲走左, 會令佢 唔好意思. 怕佢有一個雙失青年 (我就快係架啦) 既男朋友, 佢會唔開心. 怕我可能冇錢請佢去甚麼意大利 希臘 克羅地亞.

總之就係有點怕.

所以為左FIFI, 我都係要努力工作.

更何況, 都話FIFI 唔識煮野, 而FIFI 間房好似都幾亂. 所以請個菲傭似乎都係走唔甩.

倒數第十六天 - 愛上女主播

九月二十六日, 倒數第十六天

非常明顯, FIFI 係令我自豪的. 我會好想介紹佢比我既朋友識, 介紹比我既屋企人識. 而我亦都好有興趣知道佢點樣同朋友, 屋企人講起我. 我諗呢樣野, 亦係我同FIFI 呢段關係好獨特既地方. 其實我係唔鍾意帶女朋友同朋友一齊, 亦唔係好鍾意帶女朋友同屋企人食飯. 但FIFI 就是不同.

我諗, 並唔係因為FIFI 人比花嬌, 亦唔係因為佢曾經係電視台主播 (雖則我成日咁介紹佢). 係, 每次介紹佢係呢個女主播, 我都有D 虛榮感, 但我諗更重要既係, 我同FIFI 係認真的. 我唔會預期我只係同佢玩玩下, 所以亦都絕對好放心 比我既朋友, 我既屋企人識佢. 或者話, 我覺得同佢係有將來的, 而唔係 "做一日和尚敲一日鐘"的 (記得FIFI 問過我呢句野解)

所以, 今日同我媽同我妹食飯, 我就話左比媽媽聽. 在食雪糕果時, 我仲打比FIFI, 然後拎個電話比媽媽同FIFI 講.

媽媽好有趣, 好少見到佢咁正經, 好似同呢個未來小媳婦傾緊計咁. 我聽唔到FIFI 講乜, 但 FIFI 應該只係識傻笑.

實在十分可愛呢, 雖則, FIFI 話成件事最開心果個係我.

又好似真係.

倒數第十六天 - 自由行

九月二十六日, 倒數第十六天

昨晚同 FIFI 傾左成個鐘電話呢. 我諗, 科技已經令我地變得好近. 但偏偏就係咁樣先最惱人, 明明可以拉近少少, 就想再拉近多點咯.

事實係FIFI 講左好多台灣既野, 我都唔係太能夠投入. 一來佢去既地方我冇去過, 二來佢越開心, 我就越係覺得有點遺憾, 冇法同佢一齊分享佢既開心咯. 甚至有時會胡思亂想咁諗, 如果FIFI 同埋我一齊去, 係咪真係會更加開心呢? 定係其實佢自己去會仲開心?

唔知道到我去旅行果時, FIFI 係咪都會咁樣諗. 但我可以好肯定, 我係好想好想FIFI同我一齊去, 有佢一齊我會更加開心. 以前我其實從來都唔同女朋友去旅行, 但FIFI 是不同的.

在呢方面,我諗同我FIFI 好相似. 我地未一齊之前, 自己一個人見到D 有趣既野, 睇到有趣既書, 食左好味既東西...都會希望對方在側邊. 換言之, 我地覺得對方係一個可以分享快樂 同 悲傷既人. 可能就係因為咁, 我地就一齊左.

到底我同FIFI將來一齊旅行, 會去邊呢? 係意大利? 定係希臘? 定係克羅地亞? 好似都好遙遠 (不是指路程上, 係指日子上, 因為我已經冇哂年假, 實則係我已經預支埋下年既假)

不過, 大約我同FIFI 至少會一齊去左 十月啤酒節先. 難以想像FIFI 咁細個人拎住大大個啤酒杯係咩樣...

倒數第十七天 - FIFI如此多嬌

九月二十五日, 倒數第十七天

基本上, 係完全冇心機做野. 一來掛住FIFI, 二來又仲要忙旅行既事.
昨晚 FIFI 主動咁在台灣打比我呢, FIIF 原本同佢同事一齊, 但今日佢一個人去左桃園 (唔知見唔見到 劉備關羽張飛). 正因為FIFI 係一個人, 所以佢昨晚十分矯嗔, 又會扭計, 我甚至可以想像到佢充滿媚態既果個樣子.

再前一晚, 原本同FIFI 傾完電話. 收線後頑皮既我忽然醒起一樣野, 於是就打比 FIFI. 事緣係在FIFI未去台灣前, 有一次佢同我講, 問可唔可以每次傾電話收線前都有 鍚鍚. 咁結果, 果一晚, 我就打番去問佢, 在佢去左台灣時, 呢樣野係咪仲有效.

FIFI 聞言立即怪叫左一野呢, 因為佢係同佢同事一齊. FIFI 話在外遊期間 呢樣野就只係單邊生效, 即係只有我鍚鍚佢, 就好似中證監單邊徵收印花稅咁.

實則同FIFI 一齊之前, 一路都有個問題, 就係覺得好難想像FIFI 嬌嗔既一面, 因為總係覺得佢好唔 "女仔". 點知原來呢個係一個意外驚喜, 嬌嗔的FIFI 實在是十分之可愛.

不過呢, FIFI 都係唔識煮野食, 都係要搵個菲傭好D.

倒數第十八天 - 世紀之吻

九月二十四日, 倒數第十八天

今日繼續係兵荒馬亂. 東亞銀行擠提, FIFI 中午後打比我, 我都同佢講我做緊野, 轉頭先打比佢. 印象中從來冇試過咁, FIFI 每次打黎, 我都會係好溫柔地同佢講一句 "點呀?".

所以證明, 今次真係好兵荒馬亂咯, 我既電話響個不停. 而FIFI 打比我, 亦都係因為東亞既呢件事.

正確黎講, 係自從我地一齊之後, 出面既世界都好紛亂.但我同FIFI, 又絕對唔可能係置身於呢個 "金融海嘯" 之外. 因為我同FIFI既工作, 都同金融界有D關係, 實情係,我同FIFI某程度上係因為東亞銀行一齊. 我同FIFI有個共識,就係拍拖時唔講金融野.希望呢篇係唯一一篇.

就在我地一齊既果個中秋節, 雷曼兄弟破產, 美銀收購美林, AIG 陷入財困. 果排我既心情, 可以話係 "死狗咁既樣". 果時好需要FIFI 既支持.

我好記得, 二零零八年既九一八. 恒生指數裂口低開一千六百點, 當天原本約左FIFI 食早餐, 但FIFI樓下落大雨, 所以出唔到黎. FIFI 話陪我食飯補番數. 結果我地去左 食咖喱 (果排因為約見渣打銀行既緣故, 我成日都食咖喱).

結果係, 埋單離開呢間樓上鋪既印度咖喱館後, 我在樓梯抱住FIFI, 抱得好緊好緊. 然後我地都唔理會唔會有人望到, 或會唔會阻住人, 咁就在樓梯上熱吻.

然後, 當日下午, 恒指居然收復所有失地, 倒升收巿. 當晚, 中央匯金宣佈減印花稅, 並入巿增持中行工行建行. 翌日, 恒指升一千六百點.

因為咁, 果次就稱為世紀之吻咯. 我們就是一對在風暴中不離不棄的情侶.

倒數第十九天 - 若要人似我, 除非兩個我

九月二十三日, 倒數第十九天

今日整日都有點失落. 並唔係特別多野做, 但已經開始冇乜心機. 一來係繼續搞旅遊既野, 二來冇左 FIFI 在側邊 開始有點唔習慣. 朝早冇人比我叫起身, 有得意野冇人同我分享....

今日放工先掛八號風球, 為左唔同人迫巴士, 我不惜由太古廣場三期行到去灣仔碼頭. 點知天氣真係就在呢 二十分鐘變壞咯. 我出OFFICE時都冇乜雨, 之後越落越大, 仲要好大風! 去到 近碼頭一帶, D 風完全係迎面咁吹黎, 吹到我都郁郁地. 夜晚 FIFI 在 GMAIL 聽到我咁講, 佢話 "連你都吹得郁, 一定好大風", 十分可愛.

我見到FIFI 打呢句野時, 發現自己不自覺地流左幾滴眼淚. 正如寫呢個BLOG 既第一篇文時, 都係有點眼濕濕 (不過, 之後就冇). 我無法唔承認自己好掛住佢, 卒之開口講話, 好想在我走之前仲可以見多佢一面.

我仲諗緊幾時先應該比佢睇到呢度.

又, 今日比風吹郁時, 忽然諗起自己差不多有兩個 FIFI 咁重 (!). 如果我都吹得郁, FIFI 應該會成個吹走. 諗諗下, 忽然奇想, 其實如果有 兩個FIFI 咁咪得咯, 有一個放在櫃入面, 真身既 FIFI 去左台灣時先拎佢出黎.

不過諗諗下, 兩個FIFI 應該會爭風呷醋, 會打交. 調解到佢地, 我諗我都可以拎諾貝爾和平獎. 而且我諗, 如果係有兩個我 同 FIFI 一齊, 我都會同 另外果個我打交.

總覺得在呢度寫既野同我平時講既, 寫既都好唔同. 好似好沉悶, 好平鋪直鈙咁. 不過可能咁樣先係最忠實咁記低我既想法, 同情感

倒數第二十天 -旅行的意義

九月二十二日晚, 倒數第二十天

FIFI 出左張 電話卡, 所以我今日打去同佢傾左八分鐘. 有時覺得, 科技咁進步, 係咪真係好呢? 等於今日我買左部新既碌卜, 諗住去到 波羅的海都可以寫BLOG (是為 波蘿BLOG), 同埋可以同 FIFI msn.

不過, 如果去左外國都隨時可以同番香港既朋友msn, 傾電話, 上blog. 旅行既真義又好似冇左.我甚至一度好懷疑, 其實我係患上左 李照興所講既 "香港不能離開症"

真的, 雖則我好似好鍾意自己一個去旅行. 但去到幾日, 我就會掛住香港既奶茶, 香港既朋友, 香港既女仔(!). 我入左城就想衝出去, 在出面時又想攻番入黎. 在錢鍾書既 "圍城"中, 我可以一人分飾兩角.

到底係兩個一齊去旅行好丫, 定係不停咁keep住可以聯絡好丫, 定係 大家聯絡唔到, 等思念慢慢累積, 好似越式滴咖啡咁一滴一滴咁滴出黎, 先會明白咩係 "小別勝新婚" 呢 (鬼同你新婚呀!)

呢篇好似有點無聊, 但我又有時覺得之果d 記述式既日誌, 就更加無聊. 又, 呢篇既題, 係歌名黎的. 唔知 FIFI 係咪真係會想睇 陳綺貞演唱會呢? 其實我唔見得特別鍾意 陳綺貞, 但我既接受程度好高, 若係FIFI 鍾意, 我都會同佢去.

不過, 去九展, 總係令我諗起 STEPHY既走音演唱會咯...

倒數第二十天 - 鬼來電

繼續係九月二十二日, 倒數第二十天.
FIFI 卒之在朝早上網, 回左我個EMAIL

我今日中午在公司訓晏覺時, 無啦啦有個冇來電既電話打黎 . 嚇到我在睡夢中甦醒, 一拎起電話, 有把女聲打黎講英文

"May I speak to Mr. Ivan Li?"
"Yes, speaking"
"Hi Ivan, is it ok to buy the Chinese banks now?"
"em....excuse me, are you one of our clients?"
"Yes, I am one of your client from Taiwan.....哈哈哈"
原來是 FIFI 打來整我呢....好彩佢唔係講普通話

FIFI 而家好開心咯, 因為佢個女同事過左去JOIN佢. 我都同FIFI 講, 話到佢 安頓左就會投入個旅途架啦. 而家我估 FIFI 唔會早回來咯.

倒數第二十天 - RE-DISCOVERY

九月二十二日, 倒數第二十日

昨晚SEND左EMAIL比 FIFI, 但佢好似冇反應, 可能根本冇上過網. 我地有 SMS, 但我冇話佢知 SEND左EMAIL, 更冇話佢知 呢個BLOG

FIFI 在台灣好似唔多開心呢, 佢話覺得好悶, 除左買書冇野想做 (仲有要買衫比我 :p), 又有颱風打到黎. FIFI 話想明日即時回來呢.

其實我都有自私地諗,會唔會同我都有D關係呢, 如果佢即時番黎咁都幾好. 不過FIFI 期待左呢個台灣之旅好耐呀, 所以我想佢諗清楚先咯. 我都有試過旅行係咁, 但多數去得幾日, 完全放開心靈, 就會好享受架啦. 即係等於我都知我在波羅的海會好掛住 FIFI, 但都會繼續旅程咯.

FIFI 成日笑我係一個肥佬, 仲話之前D 男朋友冇一個有我咁肥 >.<. 我同佢講我會去跑步, 佢好似唔多信咁呢 (等於我話蛋撻好好味佢又唔多信咁...).

結果昨日我就真係走左去跑步. 其實搬左去新屋都完全冇跑過, 因為換左新環境, 唔知在邊跑. 點知又發現到原來巿鎮公園都好好跑. 係咯, 只要放膽咁去試, 就有好多新發現架啦

唔知 FIFI 番黎會唔會見到一個瘦左既我呢

倒數第二十一天 - 再序

今日係九月二十一日, 我中午在機場送左FIFI上機, 然後我地就會有二十一日見唔到對方. 或者當初大家, 其實都未必想像到真係會o係埋一齊. 所以大家做既中短期決定入面, 都冇諗過對方.

FIFI 今日去左台灣旅行, 十月一日先回來. 而在佢回來之前,九月三十日, 就到我離開香港, 到波羅的海三國 (即愛沙尼亞,拉脫維亞,立陶宛) 旅行. 最快要到十月十二日,我地先會再見到對方.

而家, 我同FIFI 只係一齊左一個星期. 其實我地幾時正式一齊,都仲係未有一個定論. 但我會當我地係在九月十三日, 即係中秋節 , 正式o係埋一齊的. 我地既第一個正式拍拖節目, 其實係在屯門某間七十一果度食雪糕, 都幾浪漫架.

回想番, 我同 FIFI 一齊既七日, 都有過好多好開心 (或曰好痴線) 的行為. 例如我地會在機場唱 Bohemian Rhapsody, 例如我地會在架小巴度 肉麻到 前面既師奶側目, 例如我會扮拍子機叫......

在呢二十一日度, 我諗我就會靠住呢七日既回憶去支撐. 或者, 再唔夠的話, 可以由我同FIFI 相識既第一日, 二零零八年二月十八日, 開始回憶.

我諗我地一齊, 雖則稱唔上係 迴腸蘯氣, 但亦都幾番波折. 開頭係佢有男朋友, 後來係我有女朋友. 佢一度會咒罵我係一個 膚淺, 道德水平低, 冇原則既人. 而我亦都一度覺得佢 拒人千里之外, 固執....... 兩個人最終可以o係埋一齊, 實在係好奇妙.

所以我都仲係好有信心,知道廿一日後我會更加鍾意 FIFI
FIFI, 你都會嗎?

倒數第二十一天 - 序

希望讀者唔好介意我用廣東話, 雖則我中文好, 但我始終覺得而家咁樣比較表達到自己.我甚至唔係好肯定, 呢個blog , 除左我外, 仲會有幾多個讀者

如果真係有第三個讀者, 咁就等我介紹下.呢個blog, 係寫比我女朋友 FIFI 睇既. 唔好誤會, 我同FIFI 唔係鬧左交, 佢亦都唔係死左 (啋!)

只不過係, 就在我地一齊之後一星期, FIFI 同我就要暫時分開三個星期. 由今日開始, 就係倒數二十一日. 我甚至唔係好肯定, 係唔係 呢二十一日入面, 每一日我都可以寫到 blog (之後再講點解)

不過大家應該想像到, 對一對熱戀既情侶黎講, 開始後一個星期, 就要暫別三個星期. 係有一點點難捱既

FIFI 臨上機前果晚同我講, 話不如整本 LOG BOOK, 記低哂我地開心既野. FIFI 寫字又靚 (人仲靚!), 畫公仔又叻, 呢D 手作仔難唔到佢. 我呢, 寫字又核突, 畫公仔仲核突. 所以, 或者就寫呢個 BLOG, 當係我都有參與佢呢個 LOG BOOK 既計劃

我甚至未肯定, 幾時會比FIFI睇, 定係有需要時先比佢睇. 或者係比佢, 或者係比我自己, 睇番當時, 原來大家曾經咁開心, 咁想念對方. 呢個亦係 FIFI 既 LOG BOOK 計劃想達到既效果