倒數第二天 - 手信

十月十日, 倒數第二天

我鍾意守信, 但唔鍾意買手信.可惜既係, 我鍾意守信, 但有時都被迫要唔守信. 我唔鍾意買手信, 但好多時都被迫要買手信.

首先講明白先, 你買比女朋友, 屋企人, 好朋友果D, 唔係叫手信. “大量生產”, 收既人 多一個唔多少一個唔少果種, 就係手信

禮物, 紀念品, 係高級既. 至於手信, 就係低級既既, 大量製作既. 手信係乜?
睇下呢個咀香園廣告

http://hk.youtube.com/watch?v=FtpXzFgigtk

俗不可耐既拍攝手法, 極之難聽既歌聲, 唱住 “咀香園咀香園 買手信買手信 款式至多至好味 大家高高興興買手信…”

呢D 不停洗你腦既 商業交易建議, 就係手信咯. 手信, 係一個好CHEAP, 好 CLICHE 的詞語

或者, 你見到曾志偉扮哂 INNOCENT咁同你講, 拿, 家好月圓啦, 香港“終於”有手信啦. 果D, 咪手信咯. (即係, 香港開埠百幾年, 今日先 “卒之”有手信. 之前D遊客全部唔買手信的? 番到去會唔會比人打死架?)

唔使在文字上拗, 大家都明我講乜. 你應該收過, 亦都買過,特別係出左黎做野, OFFICE 就一定最多呢D 手信.

我最討厭既就係手信好似係必然咁, 但質素又似乎必然係低落的.呢個只係一個惡性循環

以前我 OFFICE 好多人, 咁當然有D 係妥, 有D係唔妥, 有D其實都唔係好認得邊個打邊個.
由於阿A 阿B 去左旅行都買, 所以你又冇理由唔買. 而又由於 OFFICE 入面有 阿C 阿D , 所以又冇理由大細超, 要買哂比 EFG. 到最後你想塞比呀 IJK 果時, 先發現佢地三個係黎整電燈, 唔係你同事

咁既大量製作, 冇HEART, 質素低落, 係必然的.

係咯, 每次有同事外遊回來, 手信係D 乜呢. 不外乎係掉低一大包野大家拎. 每次掉低呢堆野, 我個感覺都好似盂蘭節咁. 掉低D 豆卜芽菜等佢地拎咯, 如果唔係會比鬼迷架.

後來好多旅遊地點仲進化到特別出獨立包裝, 方便大家派手信! 拿, 遊客 異化 當地人既生態, ALIENATION 又一例證.

大家都食過買過啦, 一大包草餅呀, 白痴戀人朱古力呀, 好難食既莫扎特朱古力呀, 鳳梨酥呀, 杏仁餅呀, 芒果乾呀, 肉乾呀咁. 如果D 仆街同事 (好似我咁) 去埋D 唔X 知咩既地方, 就帶D唔知乜朱古力番黎.

根據本人既非正式統計, 呢D咁既東西, 最後都係會被棄置O係度. 有部份就咁O係度無人問津, 發酵, NGAU 臭, 惹蟻, 最後要秘書姐姐/人事部出 MEMO 提醒/鬧.

都係果句, 大家唔使內疚, 因為呢個係必然的. 如果你係買果個, 既然公司一百幾廿人你都要買手信, 咁你可以點有心機去揀呢? 點會揀好野呢? 有好野我都留比自己/情人/好朋友啦. 大家記住, 番工果D係同事, 唔係朋友. 當中應該總有D, 係你恨不得大巴大巴車佢既.

你係收手信果個, 都唔使內疚. 因為, 我地在香港呀大佬, 全世界既野我地都買到啦. 你估在 巴格達咩. 果D 咩杏仁餅 白痴戀人 鳳梨酥, 你未食過咩? 食落真係覺得 “嘩, 好好味” 咁架? 乜你唔知 澳門/日本/台灣/ (自己填上), 有D咁既野咩? 要等人買番黎你先發現到?

而我經驗係, 如果你買D古靈精怪野, 例如哈薩克共和國既 孟買香蕉之類, 滯銷既機會係仲大. 因為香港人 扮哂係國際城巿, 實則就唔係好接受到新事物. 呢D 古怪野, 係冇人會食既.

以下呢盒 愛沙尼亞 Kalev 朱古力, 就係好好既例子


OK, 你覺得唔係舊杏仁餅, 唔係孟買香蕉, 而係份心意. 乜原來你D 心意可以咁大量生產架? 我就唔得了. 又問下良心, 你閣下自己買 “手信”時, 有幾有 HEART 呢? 係咪都係 見到大大包 又分得到 , 就快快手買左佢. 又或者係臨上機前, 先走去附近D 鋪頭求其搵樣呢? 呢D叫 “心意”?


OK, CYNIC 完畢, 成篇文既格調番然一轉.
我記得我走之前, 都問過FIFI想要乜野 (我大約冇用 “手信”呢個 又貶低我又貶低佢既 TERM)

是的, 諗起楊千嬅首歌嘛.
http://hk.youtube.com/watch?v=I8_5RalGAn8
“就算只得到鬚腳滿腮, 仍然, 是笑逐顏開”
我估見面時, 大約我既鬚根, 都會拮到FIFI 好痛. 希望佢在比我鍚時, 仲係笑逐顏開.

因為
“多麼想 多麼想 得你的慷慨 以感情做禮物 吻下來”

上面都話咯, 香港, 咩都有啦, 咩芒果乾杏仁餅都有啦.
咁不如, 我帶D 香港已經冇乜得剩既野番黎啦
係乜? 就係我對FIFI既掛念, 同埋真挈既感情

倒數第三天 - 深秋的黎明

十月九日, 倒數第三天

幼稚園上堂時學一年四季, 春夏秋冬, 四種景色, 非常分明. 但到小學時, 老師已經話我知, 香港的四季並唔明顯, 春天同秋天都甚短.

到左而家, 因為全球暖化, 中秋節都仲會有酷熱警告, 邊得黎有四季? 在香港而家只有兩季, 就係旺季同淡季.

在香港長大而又多愁善感既人 (好似我, 或者我阿媽咁), 多數都鍾意秋天, 或者至少作文都會寫鍾意秋天, 就正如大家都寫我的志願係做老師一樣. 絕大多數少男少女都會強說愁, 話鍾意秋天. 但在香港講鍾意秋天, 實在同講自己鍾意噴火龍差不多, 都係一d 其實你冇見過, 只係聽人講既東西

唔係話外國月亮圓d, 但波羅的海既秋天, 就肯定比香港明顯. 留意下影既幾張相, 基本上唔使加工 唔使任何日期 唔使形容, 你都知係秋天. 幾個公園都係遍地既落葉, 有陽光之下又比你感筧覺到寒意. 更加無敵既就係加埋 愛沙尼亞果D 已經半廢棄狀態既火車站 (lonely planet 形容為 seeming abandoned train stations), 或者係果d 人影都唔多個既小鎮


黎到波羅的海既時間已係十月頭, 進入旅遊既淡季, 酒店都減價, 尤幸天都仲要去到七點先全黑. 呢個時間, 氣溫一般黎講得十度左右, 可算係深秋, 再遲少少就會係冬天了.



之前講過, 唔鍾意維爾紐斯, 後來發現左“奇蹟”, 對紐巿既反感已經滅少左. 但真正令我感受良多既, 居係係一道普通不過既門,




呢座東西, 叫做黎明之門, 絕大多數人都係在新城區經呢度門行入舊城區. 咁我當然 就唔係 絕大多數人, 如果我當初做左 絕大多數人, 可能對維爾紐斯印象會好番好多.

幾本旅遊書都冇講點解叫做黎明之門, 而唔係 學友之門, 只係話呢座係舊城牆唯一一度保留落黎既門. 我估大約係度門向東, 朝早第一度曙光就在呢度射入黎. 或者以前既僧侶一朝早就由呢度門出發, 一路行到去紐爾維斯大教堂 , 之類.

而非常應景地, 當日行到呢度, iPod 就播起 “深秋的黎明” 呢首歌.

慎防讀者唔知, “深秋的黎明”, 就真係黎明主唱的. 佢果時有首 “人在黎明‘, 之後又整首 ”深秋的黎明“, 令我好想狂呼 ”黎明不要來.

(無線版, 冇咁娘, 但唔完整
http://hk.youtube.com/watch?v=WF_7acW3ss4 無
寶麗金版, 完整, 但很娘
http://hk.youtube.com/watch?v=CpfuK5kY8y0)



又再慎防讀者太年青, 果個年代既黎明, 係十分之紅的. 是的, 果個年代我係唔鍾意黎明的. 所謂既四大天王, 列出黎時差不多一定以佢為首. 而根據眾多非正式既統計, 黎明亦係四人之中最多支持者, 而d 支持者又最瘋癲既.

係咯, 黎明既和記電話廣告已經成為 集體回憶 (呢個詞近年夠哂濫). 就算唔成長於果個年代, 都聽過 黎明既 “夏日傾情”
“阿MAY, 你隻腳點呀?” “LEON? 真係你??? 我好開心呀!!!!”

係咯, 黎明就係萬千少女既偶像, 而最煞食既莫過於佢用佢壓低佢果把死人聲同D 癲狂女 FANS 講 “拿, 你地應承我, 一定要聽爸爸媽媽話, 要比心機讀書喎”.

講左咁多, 大家都估到, 我當然係唔鍾意黎明的. 實則亦都冇乜得你選擇, 黎明係眾多女同學既情人, 亦即係眾多男同學既情敵啦! 我雖則讀男女校, 但初中混埋既都係 男同學, 仲要係極度陽剛果堆. (我只係同佢地一堆, 並不代表我都陽剛)

咁你大約想像到, 在呢個咁既社群, 有乜可能同人講你鍾意黎明? 果個年代我地認為鍾意黎明既只有兩種人, 就係女仔, 同埋基佬!

又, 後話係, 我中學同大學時, 都各自識得一個坦白承認自己係基既男仔, 而兩個都不約而同鍾意黎明的! 其中一個仲痴線到黎明開廿幾場演唱會佢睇足廿幾場, 仲買貴飛. 我諗, 一個基佬, 只會鍾意黎明或者郭富城, 好難想像一個基佬好鍾意張學友. (你識既, 唔使介紹我識).

但其實, 我呢班咁陽剛既 朋友 , 其實大家暗地裏, 都會偷偷地聽黎明既. 我甚至 好記得, 果一年黃家駒去世, 我地就在屯門某公屋度攻緊四方城, 電視播緊夏日傾情, 我地仲大家一齊唱. 呢個場景在我腦中深深烙印左, 我都百思不得其解.

而我呢, 正如 FIFI 話齋, 係一個冇乜原則既人. 儘管朋輩壓力令到我唔鍾意黎明, 但佢既歌我一樣照聽. 正如好多歌手我都唔鍾意, 但佢地既歌我一樣耳熟能詳. 因為歌者 只係一個工具, 首歌本身先係靈魂. 固然好既歌者可以 令差既歌變好, 好既變更好. 但我地都知道, 黎明應該唔係其中之一.

ANYWAY, 講左咁多, 都係想講, 深秋的黎明係一首我好鍾意的歌. ;在深秋聽特別有 FEEL, 在維爾紐斯既深秋聽, 特別好 FEEL.

總之, 我就在果朝一早起身, 諗住果句“夜霧慢慢散去, 在深秋的黎明”
穿過黎明之門, 諗住果句 “離別最後的季節, 清風中留在涼意”
一路趕路, 諗起果句 “遠行的我 看著天空慢慢亮起來”

心中想既, 只有在地球另一方等我既 FIFI
“深秋的這樣一個黎明, 你不必怕寂寞, 愛的情意, 漫天過海會包圍你.”


呢篇野十分中學作文 FEEL

倒數第四天 - 恐懼只因擁有

十月八日, 倒數第四天

有時真係唔好唔信邪

上年年尾, 我到西班牙葡萄牙及摩洛哥旅行. 原定是香港經倫敦轉機到巴塞羅拿, 然後坐飛機到葡萄牙, 再回西班牙馬德里, 再到摩洛哥, 最後在摩洛哥坐飛機到巴塞羅拿.

叫得 “原定”, 就當然出了點岔子. 葡萄兩字同個 情字一樣, 縱橫筆劃甚多, 易生枝節.

出發之前, 我已經覺得唔係好自在. 當晚係十一點夜機, 但直到八點幾我都仲在公司, 比呢個某位英國人煩住問 中銀香港的問題. 果刻我已經有D 不祥之兆, 我寫左篇文, 話覺得自己可能會死在西班牙呀, 或者會比人打劫呀咁

結果, 我冇比人打劫, 亦都未死, 不過係在馬德里撞地鐵, 撞到手骨都斷埋 (!), 被迫中斷行程, 由保險公司運番香港 做手術.

而更堪玩味既係, 出發之前, 我在網上寫左篇文, 用左楊千嬅首 “自由行” 既歌詞, 篇文叫做“願我那尾站在馬德里”. 結果真係一語成讖, 而家個尾站唔方唔在馬德里了!

是為前事.

今次波羅的海三國之行, 唔知做乜我係咁諗起撞飛機. 可能係見到荷蘭航空果架飛荷蘭至愛沙尼亞既飛機, 我就唔多開胃. 其實架機係冇野的, 至少都仲係噴射機 當年由英國飛德國, 我連螺旋槳機都坐過!

但, 架飛機, 叫做 FOKKER 咯, 真係 MEET THE FOKKERS. 見到呢個名, 我就硬係覺得會撞飛機.

我搵D相關既資料黎睇 (你睇我幾無聊), 其實好多成年人都有 若干程度既飛行恐懼症. 最出名既 當然係 前荷蘭球員 柏金, 佢係點都唔肯坐飛機的! 聽聞係因為佢曾經有朋友在空難中喪生. 但球會, 同國家隊, 要東征西討架嘛, 咁點算呢? 佢老人家原來會 提早幾日出門, 自己開車去 (!). 而如果路途太遠而D 賽事又唔多重要, 教練多數都會放呢位皇牌球員一碼, 唔使佢舟居勞頓.

我呢, 就真係相當恐懼. 特別係今次我要坐五程飛機. 即係將個出事機會由n 變到 n x 5. 香港飛荷蘭, 荷蘭飛愛沙尼亞, 聽日就要立陶宛飛番愛沙尼亞, 然後飛荷蘭, 再飛香港

我早兩日直頭有個念頭, 就係不如由 立陶宛坐巴士番愛沙尼亞啦, 咁可以將我剩低既出事機會, 由 n x 3 大幅減到變做 n x 2.

不過, 我畢竟都係一個講科學既人. 統計數字證明, 其實坐巴士既死亡率, 一定仲高過坐飛機. 況且 撞飛機 好似多數都係死左一了百了, 仲有幾百萬賠. 而死唔去既就冇事, 好似好少聽到有人撞飛機會 變左植物人咁架喎. 但坐巴士呢, 撞你唔死,陣間變左植物人, 又夠大劑.

所以我都係坐飛機.


講咁多野做乜? 就係話比你知, 我老了. 怕死係 小朋友 同 老野既專利. 青少年係唔會怕死的 . 我後生果時, 一年諗幾十次想死, 成日都想自殺.

但而家呢, 開始 蛇 quare (quare, as in square). 開始怕死, 怕失業, 怕膽固醇.
一切一切, 都係因為擁有. 乜野人最惡? 窮人最惡, 因為佢地冇野可以輸. 好似十年八年前, 我爛命一條, 單身寡佬, 周身冇蚊, 有乜野可以輸?

而家呢, 蚊都仲係冇乜, 但有左 FIFI. 擁有左, 我就怕失去, 我怕失去佢, 亦都怕 我會走唔番佢身邊.

所以而家我十分小心, 波羅的海之旅, 陰暗人少既路我唔行, 比人撩我絕不還口, 住都只住單人房, 過馬路十分小心.

因為, FIFI 在香港等緊我, 我唔可以失約.

我仲未開心夠, 同FIFI 一齊既時間, 永遠都唔夠. 如果我就咁寫左, 呢個故事未免太淒美, 亦都太殘忍了.

是的, 一個人在波羅的海行路, 就會胡思亂想. 想到最尾, 就會想呢D 生與死既哲學問題. 在香港, 上車就訓啦, 十分鐘既地鐵都訓得著呀. 晚晚番到屋企都即時可以訓著. 就算唔眼訓, 都有數之不盡既節目, 可以上網, 可以睇戲, 乜都可以…邊得閒諗咁多哲學問題.

所以我在香港係冇咁細膽的, 甚至大膽到在 IFC 一野拖住FIFI.

將呢堆野想法同 FIFI 講左, FIFI 話佢好旺夫的, 所以我一定可以平安回來.

倒數第五天 - 奇蹟

十月七日, 倒數第五天

由入城既第一刻開始, 我已經唔鍾意 立陶宛, 唔鍾意 維爾紐斯 (Vilnius) 呢個城巿.
討厭果D 絕不禮讓既司機 (當然可能係我架長途巴士既司機本身問題)
討厭佢 極之 蘇俄既 新城區 (立陶宛唔似蘇俄, 唔通會似東京?)
討厭佢 個巴士站 離舊城區好遠 (車你去到酒店門口好未?)
討厭佢 既舊城區令人迷路 (擺明係個人問題啦)
討厭酒店既 WIFI 慢過蝸牛 (去旅行又上乜鬼網? 要上極速寬頻番屋企得啦)

但無論如何, 生活依然係要繼續, the show must go on, 以上既自問自答爛GAG亦到此為止.

於是, 在呢個收費一流既酒店 同 FIFI MSN 左一輪後, 下午都係出左去行. 時為下午三時許. 然後, 就踏上我尋找"奇蹟"之旅.

不錯, 在維爾紐斯大教堂廣場, 就有塊咁既階磚, 上面用立陶宛語寫住 "奇蹟". 但, 最可惡既係, 由於迷信既原因, 任何人都唔可以將呢塊階磚既位置講出黎. 所以旅遊書冇話你知塊野在邊, 果度亦都冇任何指示. 奇蹟, 係要自己親手 (腳?) 去搵既.

又, 同其他古怪傳說唔同, 呢塊階磚背後既古仔, 係百份百既真人真事.1989 年, 波羅的海三國 有二百萬人企出黎 抗議蘇聯占領, 要爭取獨立. 佢地 手拉住手 架起一條人鏈, 由 維爾紐斯 拉到 里加 拉到 塔林 (!!). 起點, 就係呢塊階磚. 最後蘇聯果然解體, 是以有 "奇蹟" 階磚

講番當日, 我在大教堂廣場一路搵時, 忽然腦中閃過一個念頭:
如果我係夏天黎咪簡單咯- 果度一定有好多遊人聚集, 我望下廣場度邊度最多人咪係.
係咯, 我居然有一刻覺得, "奇蹟" 係可以偷懶既, 係可以靠其他人搵左 然後你搭順風車既.
真係好慚愧

我搵左一陣 (其實都係幾個字), 當中有幾次以為自己已經搵到 "奇蹟", 但原來係坑渠蓋一個! (見圖).
係咯, 回想下,呢幾年, 有幾多次, 我以為自己搵到奇蹟, 望真D, 原來只係坑渠蓋一個!
於是乎, 食左幾次詐糊既我, 又再閃過一個念頭-
塊野會唔會已經唔再O係度架? 呢個世界仲邊得黎咁多 "奇蹟", 坑渠蓋就大把!
(正如 彭浩翔在 "公司復仇記"話齋: 呢個世界冇王子, 只有仆街, 同埋扮王子既仆街)

係咯, 我只係搵左幾個字, 居然就有一刻動搖左, 懷疑左自己既信念, 以為呢個世界係冇"奇蹟"既
如果我根本唔信世界係有 "奇蹟", 咁我而家應該在房上緊網, 或者在香港番緊工啦
真係好慚愧

最後, 我當然都堅持信念, 否則就冇呢篇野啦.
十分老土地, "奇蹟" , 其實就在好易見到既地方 (我都迷信, 我都唔會話你知在邊). 我依照傳說, 企在塊階磚度轉左一個圈. 聽講咁樣, 就可以令夢想成真.

又, 點解係轉一個圈呢? 因為 "奇蹟", 立陶宛語係 "STEBUKLAS", 正係階磚上既八個字母. 由S 開始轉一個圈, 番番 S 結束, 就係 S-T-E-B-U-K-L-A-S. 呢個, 係我自己估出黎的, 應該都係事實之全部. 旅遊書只係教你轉, 並冇話你知點解, 同在邊度開始轉

又, 如果轉果個方向錯左, 會唔會行衰運架?

倒數第六天 - Alienation

十月六日, 倒數第六天

有時睇波都可以學到好有哲理既東西呀下.
阿根廷球員 Almeyda, 在事業如日中天時決定退休, 呢位讀哲學既足球員比既解釋係:
"Football at this level is fake, it's all a pretend world. We get paid millions to play a game, but we are just pawns who sell ourselves to keep this system going. I am not just Almeyda the footballer. I am Almeyda the person, the father, the farmer. That's who I am. And every day that passes and I stay in football, I move away from what I am"

請將 football 改為你自己做既職業, 十分合用.
又, 最最諷刺既係, Almeyda 收左山一年, 就忍唔到要再出山

------

黎到波羅的海三國既第二站 拉脫維亞. 好自然就會對比下同愛沙尼亞有乜唔同. 非常簡單地, 愛沙尼亞就比較北歐, 但拉脫維亞就比較 俄羅斯. 睇地圖都大約估到.

有趣既係, 波羅的海三國既首都古城區, 都係世界文化遺產. 相比於以前去 西班牙呀, 捷克呀咁. 三國都係仲比較有自己特色既地方. 跨國大集團既分店 呀, 美式連鎖快餐店等等呀, 都唔算成日見到.
固然麥當勞就 每個城巿都有, 但除左麥當勞, 實在見唔到好多其他既跨國企業 logo

愛沙尼亞 鄰近北歐, 經濟增長亦係三國中最強的. 但在呢個suppose 係比較先進既地方, 反而唔見咩高樓大廈 玻璃幕牆之類. 反而係在 拉脫維亞既里加, 雖則古城區仲保留得好好. 但一河之隔, 已經見到 coca cola plaza , 大型既 shopping mall, 大大個 LG 既 logo. 全球化實在係無可避免, 但見里加城中, 物價已經飛升哂, 同旅遊書中所提既相距甚遠

今次旅程, 最開心既係一路遇上既當地人都非常之好. 旅途上總會遇到各式各樣既大小問題, 當地人唔單只有問必答, 好多時仲熱心地主動伸出援手.

我諗呢樣野, 先係我今次波羅的海三國之遊既最大得著. 人活著, 需要清新既空氣, 潔凈既水, 同埋純真既感情. 但如今, 空氣越黎越污濁, 水源已經被污染, 而純真既感情亦都買少見少.

我其實大約估到, 三地既人民, 最後都會變質. 基本上係有板你睇, 布拉格如是, 華沙如是, 布達佩斯如是. 經濟發展 同埋 遊客, 係令到當地人變質既. 一切一切既所謂 “傳統” 工藝呀, 表演呀, 都係為迎合遊客喜好. 我估唔使好耐, 里加既教堂廣場, 就會有唔少 貴到咋舌既食店, 就好似馬德里咁. 維爾紐斯最後可能好似羅馬咁, 成為小偷騙子雲集之地, 而塔林古城, 可能會見到好多著住傳統服裝 - 不過係收錢帶你行tour 既人.

真的, 今日我遇到咁多熱心無私既人, 佢地既原則, 佢地既心靈, 無可避免地面對緊好大衝擊. 可能係睇到有機會改善自己既生活, 可能係因為物價颷升太快...... 總之, o係一個時代之中, 一個人既份量, 其實並冇乜幾重.

亂寫左咁多, 我只係想到, 雖則我為金錢出賣左我既本性. 是的, 邊個番工唔係出賣本性呢? 人既本性唔應該係朝早六點起身番工的. 但無論出面既世界變成點. 我都希望 FIFI 知道我對佢始終如一. 我所要求的, 就只是佢相信我. “即使全世界都覺得我講大話, 你都會相信我”.

你記得嘛, 這是我地第一次約會睇的戲.

Are you really sure that you believe me
When others say I lie
I wonder if you could ever despise me
You know I really try

倒數第七天 - A Decade of Love

十月五日, 倒數第七天

唔知 FIFI 今日有冇睇十月初五的月光呢. 是的, 十月初五是西曆十月五日, 唔係農曆.

在我未同 FIFI 一齊時, 曾經有一次再街上遇到佢, 就在匯豐銀行對開. 在寒暄幾句道別之後, 我望住 FIFI 纖巧的背影, 偷影左佢一張相. FIFI 後來聽番, 評曰 "你睇下我個背影幾高貴". 背影都有高貴唔高貴, FIFI 真是相當有趣

擁有高貴背影既 FIFI, 好似好少睇港片. 唔知做乜佢會走左去睇 "十分鍾情". 可能係受左我影響吧. 正如因為佢, 我走去睇卓韻芝, 走去睇陳慧 咁咯. 我覺得咁係好的, 一段好既戀愛, 應該係可以令到大家都進步. 而唔係互相既縱容, 齊齊咁墮落

在我地未一齊時, 我一個人睇左呢套戲, 睇左一陣就 SMS FIFI, 話比佢知好好睇.(我地係有教養的, 唔會在戲院講電話) 然後在我地一齊後, FIFI 又自己走左去睇. 並唔係因為我唔陪佢去睇 (我樂意之極), 而係因為 我已經唔在香港.

十分鍾情, 表面好似係解 好鍾意. 但其實個戲名應係讀左 "十分鐘 - 情" 英文戲名 A decade of love , 更加簡單.套戲既意念就係 香港回歸十年, 十個故事, 每個十分鐘. 唔多唔少呢個意念, 係黎自 "我愛巴黎" 呢套相當有趣既戲.

講情, 呢套戲其實不錯. 情唔一定係男女之情, 可以係朋友, 屋企人 都可以.但十分鍾情 個別單元拍得唔好既地方, 就係冇左 "香港" 呢樣野.基本上, 有幾個單元既情節, 你放在 拉脫維亞拍, 都係冇乜分別既. 至於講 "回歸十年" 呢個主題, 就更加係唔講都冇人知. 主要都只係得頭兩個古仔 ("舊山頂道" 同埋 "路漫漫雞蛋赤紅紅") 帶到出黎.

FIFI 以前寫過, 佢對香港呢個地方, 係冇乜感情的. 呢個係我同佢又一不同既地方. 唔好睇我叫做讀過下番書, 平時又鍾意睇鬼佬雜誌 (都係為搵兩餐), 去旅行又要去歐州. 其實無論去到邊, 我都諗住我既屋企. 呢度既屋企, 係就宏觀而言, 即係指香港.

時間, 地點, 可能只係一個舞台. 但故事總係要有呢D 舞台, 而當故事變得不朽時, 果一個年代, 果一個地方, 亦都同時變得重要.

遠在我地O係一齊之前, 我都話要同FIFI 去澳門, 結果換黎比佢話我痴線. (其實我相信, 如果果次唔係我請唔到假的話, FIFI 應該真係會同我去左澳門, 而我地可能就會係果時一齊左). 剛一齊時, 我亦都話要同FIFI 一齊去台灣 (可惜無假). 一齊左之後, FIFI 話想下年同我去俄羅斯 (因為我有個同學在俄羅斯, 而FIFI 鍾意俄羅斯). 甚至乎, 我地討論過可能會一齊去 關島既教堂, 一齊去瑞典尋找 ABBA, 一齊去意大利過羅馬假期, 一齊去克羅地亞既阿德里亞海岸…

但在呢一切一切之前, 其實對於我同FIFI 生活既呢個城巿, 我地都好應該去珍惜佢. 因為冇佢, 就冇FIFI, 亦都冇我, 亦都唔會有呢個故事.

儀式中有一拜天地 二拜高堂. 既然新人必然會在婚禮上多謝雙方父母, 將自己及配偶養育成人. 咁我都覺得, 我應該多謝呢一片彈丸之地, 孕育左我, 同埋 FIFI, 同埋我地既感情.

當然, 可能冇左香港, 好多愛情故事可能仲感人, 我同FIFI 可能係非州某個食人部落 既同族, 可能更加浪漫. 甚至好多人會覺得, 香港呢撻咁既地方, 係埋沒左自己. “如果我唔係在香港, 就應該點點點點”

這是在邏輯上是成立的, 不過咁講, 我覺得好似太不近人情咯. 咁講好似我同阿媽講話 “就算冇左你我都一樣會咁叻, 其實係你埋沒左我添”. 呢個有可能係事實, 但咁樣去諗, 又恰唔恰當呢?

所以, 儘管我成日對香港人香港事睇唔順眼. 但每次一離開香港, 我都會好掛住香港. 因為, 佢始終係我地既家.

倒數第八天 - 相思成災

十月四日, 倒數第八天

今朝坐早班巴士, 離開塔林, 到拉脫維亞的里加(Riga). 七點巴士, 即係六點未夠就起身. 都說波羅的海諸國科技興國, 望下第四幅圖, 就連巴士上都有 WIFI 上 (有冇 FIFI 上?), 仲要過左境要轉CHANNEL . 咁大家當然又估到, 呢一部份, 係在巴士上面打的. 我同樣地發左個 EMAIL 比 FIFI, 如果上次在愛沙尼亞火車上的都未夠獨特, 今次在巴士上的, 應係最獨特啦. 我就是想將最好最特別的都給 FIFI (咁當然最最好最最特別的, 就係我本人啦, 都比埋 FIFI 了)

在Riga的黃昏景色中, 想起今日先係十月四日, 仲有成個星期先會見到FIFI, 即時就有點眼濕濕. 又想起 FIFI 果句 "我想你想得快要哭了", 現在倒是每一天都在我身上發生.

開頭係FIFI 去左台灣, 但我地都有傾電話. 今次我一去十幾日, 我深明白FIFI 都會好掛住我, 我亦都好掛住佢. 所以我做左好多野, 企圖去減低呢種思念之苦. 寫EMAIL啦, 寫呢個BLOG 啦, MSN 啦, WEBCAM啦, 甚至最後都係用幾十蚊一分鐘既漫遊打比 FIFI.

但做呢D野, 好似口喝飲海水咁, 越飲越渴, 越寫越傾就越是思念.

唯有盡量多D 諗住我同 FIFI 開心既事情啦. 好似第三個圖既呢個 哈哈笑餅, FIFI 睇到好開心呢. 我仲即時在 WEBCAM 中 扮呢個餅乾的表情, 逗得FIFI 好開心.

在里加的聖彼得大教堂, 我點燃了一支 (定一舊?) 蠟燭. 側邊有紙, 原本想寫FIFI 的名字, 但好似好怪, 好似打小人咁. 所以只係燃起燭光, 希望FIFI 一路平安健康, 希望我地可以天長地久.

講左出黎唔靈架可? 唔理啦, 唔咁迷信了. 巴士都上到WIFI啦, 唔理得呢D野了

倒數第九天 - 大學之道在明明德

十月三日, 倒數第九天

今日一早離開塔林, 坐早班火車去左Tartu, 愛沙尼亞第二大城巿. 不過並冇聽iPod, 並冇播 "早班火車", 否則個意境都不錯.

愛沙尼亞全國先得百幾萬人, 四十萬在塔林. Tartu 呢個話就話係第二大城巿, 但人口不過係十萬人. Tartu 有 五份一既人口係大學學生同教職員, 係一個大學城. 火車上已經見到好多疑似係學生既人, 拎住碌卜, 在討論類似功課的野.

係咯, 你有留意嘛, 佢地在火車上拎住碌卜呢. 正如我, 都在火車上拎住碌卜, 寫呢篇 blog. 北歐 及波羅的海諸國, 以科技興國. 在愛沙尼亞, WIFI 無處不在 (可惜FIFI 唔係無處不在), 甚至火車上都有. 我甚至在火車上 寫左個EMAIL 比 FIFI. 有個男朋友在愛沙尼亞的火車上寫EMAIL 比佢, 我估FIFI 可能係 七百萬香港人中最矜貴的一個.

大學城, 就係咁的模樣. 雖則冇乜人聽過 Tartu University (我同人講去愛沙尼亞, 好多人都唔知在邊, 更甭講 話 Tartu, 可能佢地以為係 T.a.T.u) , 但Tartu 大學都有名人. 樓上第一副相就係了. Wihelm Ostwald, 1909年諾貝爾化學獎得主, 在呢度就讀及任教. 會考同高考化學都要讀製造硝酸既 Ostwald process, 之唔係name after佢.

總覺得係要咁既環境, 先有真正既浪漫, 先孕育到真正既學問. 我同FIFI 都係港大學生 (呢個年代真係旺角一個招牌跌落黎都壓死幾打大學生), 但並唔係在果度認識. 後來有次番番去港大, 都冇乜咩特別感覺, 可能因為時間太趕忙既關係.

係咯, 香港人, 時間太趕忙啦.特別係香港大學, 幾步路就去到聲色犬馬既蘭桂坊, 三扒兩撥就去到金鐘中環既商業區. 學生終日耳濡目染既係邊個邊個搵幾錢, 咁又如何可以做到學問呢. (咁固然, 做學問, 有乜價值, 就係另一個問題).

有唔少愛沙尼亞人都會去 Tartu 影緍紗相, 大約同香港人去台灣差不多. 上面既 "kissing student" 噴泉, 就係取景既熱點. 嗯, FIFI 讚我呢張相影得好. 實則好多時我都係千揀萬揀先決定放邊張相上 黎的, 好似FIFI 千揀萬揀揀左我咁...

如果FIFI 都在就好...

倒數第十天 - 依依不捨毋忘我的愛

十月二日, 倒數第十天

覺得再咁寫落去, 就可能變左愛沙尼亞遊記, 但呢個地方, 唔係為愛沙尼亞而寫, 而係為愛而寫.

今日去左愛沙尼亞巿郊, 前俄國海軍基地既 柏迪斯基. 地方冇乜特別, 一片荒涼, 周圍都係廢置既建築物. 成個鎮住得四千人, 得幾條大道. 為左尋找傳說中既 柏迪斯基燈塔, 我就在上面呢條咁既道, 行左一個鐘 (咁來回, 就係兩個鐘). 當中只係在回程撞到一個人, 沿路倒係遇到一隻貓, 一隻狗, 白鴿數隻, 同埋唔少蝸牛.

中途, 仲要係相當大風 (海灣嘛, 望下第一張相既海浪已經知大風), 同埋落住雨. 感覺, 十分 bleak. 而呢個時侯, 相當唔浪漫地, 我拎左部 iPod 出黎聽.

我得承認, 在愛沙尼巿郊既 核潛艇基地, 聽住 容祖兒 甚至 HotCha 之類, 係十分怪奇怪既一回事. 但, 其實我同飛飛一齊, 其實都係十分奇怪, 或曰奇妙既一回事

兩個鐘頭內, 聽左唔少歌, 唯獨係有兩首, 想同FIFI 分享. FIFI 話鍾意ABBA 年代既樂曲, 但我覺得佢好似只係鍾意果個年代, 某部份既樂曲. 呢個係好正常既, 因為FIFI 始終唔係果個年代長.

而今次我記得既歌, 全部都係陪我長大既歌. 甚至已經無分歌手, 通通照單存收. 因為我懷念既, 唔係李克勤 楊采妮, 而係果一個青春既年代.

或者懷念既, 係果個敢愛敢恨, 大情大性, 但又單純非常既年代. 多年之後, 一度以為呢種心情永遠離我而去. 愛情淪為一種形式, 一種交易. 女仔因為我有才華(曾經啦下) 而喜歡我, 女仔因為我搵錢搵得多 (曾經啦下) 而自動走埋黎. 不錯, 以前睇我唔上眼既女同學, 而家主動向我獻媚. 我絕對承認, 呢件事本身, 令我有種變態的快感 , 甚至開心左好多日. 但難道, 呢個係愛情嘛?

唯獨係FIFI, 佢鍾意我, 只因我就係我. 佢令我搵番真正既愛情, 而唔只係一個女朋友.

講左咁多, 送番今日呢兩隻歌比 FIFI:

第一首係楊采妮既 毋忘我的愛
http://www.comp.nus.edu.sg/~nghoongk/lyrics/writer40-1.html#lyric7
呢首歌原來相當冷門下, YOUTUBE都有好多楊采妮既歌, 但偏偏呢首冇
FIFI 不如搵個 MP3 黎聽下, 或者等我番香港SEND比佢

重點當然唔係楊采妮唱歌好唔好聽,或者靚唔靚. 重點係, 果一個年代, 以及我相當鍾意既歌詞. 我覺得都相當應景下

"真的不知你我如何竟可愛上 真的不知一聲愛我紅透面上
真的不知你眼神還有我方向 從不知而竟然今天愛上"


第二首, 更加應景, 就係叫 依依不捨, 李克勤的.
http://www.youtube.com/watch?v=C27BELxpwbA

除左歌詞相當緊要外 (成首貼在下面了), 不如再講下呢首歌既背景.
是的, 對於果個年代既歌, 好多都可以好似中文課本咁, 講下創作背景, 作者生平等等. 而導讀既當然係我啦. FIFI 鍾意我講古仔

呢首歌大約係 04-05 年間既產物, 當其時李克勤轉投星光唱片, 人氣開始下滑. 結果唔知邊個諗既主意, 就送左佢老哥去 美國學音樂云云 (編曲既Tommy Mandel , 就係Bryan Adams 既鍵盤手).

於是乎, 就有左 "REBORN" 呢一隻碟, 同埋依依不捨呢首第一主打. 平心而論, 我覺得呢隻碟係得既, 當中有唔少百聽不厭既歌. 又, 呢隻碟仲放在我家 CD架上.

但, 我覺得係得, 並唔係大哂的. 當其時既巿場反應, 真係相當麻麻. 特別係 李克勤在 MV 留鬚既呢個造型, 絕對係劣評如潮. 李生後來香黎香港都仲係呢個 LOOK, 當然亦都不為巿場所接受. 到後來剃番乾凈, 換左 主打 "為妳流淚" 先至有番D好評.


講左咁多, 無非都係想講, 呢首歌 對而家既我, 特別有意思. 除左相當明顯既歌詞外, 而家我已經四日冇剃鬚, 十足十李克勤在 MV 果個 FEEL 咁.

而更重要既係, 當年歌詞比賽, 我就唱左呢隻歌. 不過事實, 呢隻歌係唔適宜歌唱比賽唱既. 我自己都覺得唔掂 , 當然無緣決賽.

寫左咁多, 不如 FIFI 都搵黎聽下....想像下我唱果段

"我會我會掛念你 你那幽幽的香味
即使分開流浪到遠地 造夢亦願一起
短短分開也是美 點點相思的滋味
每晚每晚沒法不想你 只得默默倒數再會期"

依依不捨

曲:鄧文傑 詞:克勤
編:Tommy Mandel

* 黎明來臨前是最美 依依不捨地擁著你
互望著心愛的人 這句再見怎說起
如能明瞭別嘆氣 我要遠去天際飛
別落淚這次分離 你要當作磨練自己 *

# 我會我會掛念你 你那幽幽的香味
即使分開流浪到遠地 造夢亦願一起
短短分開也是美 點點相思的滋味
每晚每晚沒法不想你 只得默默倒數再會期 #
Repeat *

我會我會掛念你 你那幽幽的香味
即使分開流浪到遠地 造夢亦願一起
短短分開也是美 點點相思的滋味
每晚每晚沒法不想你 只得默默倒數
Repeat # # #

倒數第十一天 - BUBBLE TIME

十月一日, 倒數第十一天

嘻, 唔可以再咁架, 唔可以再係咁掛住FIFI 唔去旅行. 否則就當初應該直頭唔好上機.
結果而家係愛沙尼亞時間中午, 我都仲痴住部電腦 睇EMAIL, 寫BLOG. 雖則我好掛住FIFI, 但都會聽佢話, 要出去了. 因為, FIFI 要我番黎講古仔比佢聽呢.

在機上反覆將FIFI 既信一睇再睇. 但最記得, 反而係我地臨別, 佢講果句 "無論點我都會咁你". 最可愛既係 FIFI 要 蹺高腳先在我耳邊講到.

我諗, 如果能夠捱得過今次既 "金融海嘯", 而我既一千萬退休大計又真係成功的話. 我會同 FIFI開番間鋪頭, 就叫 BUBBLE TIME 啦, 呢個構思幾好. 係我在 荷蘭機場影左間叫 BUBBLE既 SEAFOOD BAR, FIFI 睇左張相後, 就諗左呢個IDEA.

當然, 呢D野講就浪漫. 實則都係會蝕錢收場. 所以只能當興趣做, 等我搵夠收山先做啦


其實我昨晚半夜黎到呢度, 只係接觸過 機場唱錢既阿嬸, 的士司機, 同埋旅店接待既姐姐. 但又冇覺得佢地好陰沉呢. 雖則愛沙尼亞都係被 德國 同 俄國統治, 但至少佢地並冇 受到咩 屠殺之類. 好多古建築都保存落黎.

更何況, 愛沙尼亞而家都仲好多俄國人嘛.

哎, 明明係寫FIFI, 做咩變左愛沙尼亞遊記呢?

ANYWAY, 應該唔會打比飛飛, 但會UPDATE個BLOG. 亦會SEND MAIL比佢.

唔知 FIFI 爸睇到呢個BLOG會有咩反應,.....

倒數第十二天 - 再別

九月三十日, 倒數第十二天

終於又要分別咯. FIFI 番黎後, 就到我要走, 留低FIFI一個. 其實到上機前一刻, 我都仲諗過唔走的.不過FIFI 其實都係好幸福的, 我諗全香港冇幾多個女仔, 會有個在愛沙尼亞為佢寫BLOG 既男朋友.

昨晚FIFI 收左扎花, 我見到佢好開心呢. 佢同扎花都一樣咁靚.夜晚唔知做乜同佢左春園街食鵝.

結果FIFI陪我番屋企執行李, 仲在我度訓左一晚, 第朝再送我機. 呢一晚令我好記得呢, 因為覺得, 好似已經同 FIFI O係埋一齊好耐咁, 雖則我地只係一齊 幾個星期.好記得呢一晚, 我抱FIFI 抱得好實

FIFI 話佢會去學煮野, 令我好感動呢. 其實我想話比FIFI聽, 佢唔識煮野都好, 我都會咁愛佢, 根本係冇關係的.

又, 又講D唔浪漫既野. 當晚美國眾議院就否決救巿方案, 杜指大跌777點. 我入機場果朝心不在焉, 結果我同FIFI講, 如無意外, 我番黎就應該會冇野做.

FIFI 好認真咁同我講, 叫我當放個長假 (悠長假期乎?). 仲話無論點都咁愛我....

嗯.

順手講埋, 去到荷蘭, 我再望一望新聞, 見到恒指又黎一個 v型反彈, 裂口低開一千點後回升收巿.可能今次因為我地在機場有 goodbye kiss 啦. 又一個世紀之吻

於是乎, 去到愛沙尼亞 Tallin, 我又收到d 公務既email. 好似, 又未使失業住喎.

FIFI 應該係幾旺夫的.